СӨҮЛ ХОТЫН АВТОБУСНЫ ЖОЛООЧ НАР ПҮРЭВ ГАРАГТ /2024.03.28/ АЖИЛ ХАЯАД ХЭДХЭН ЦАГИЙН ДОТОР ЦАЛИНГАА НЭМҮҮЛЖЭЭ.
БНСУ-д резидент эмч, анагаахын профессорууд ажил хаясан байгаа. Мөн Сөүл хот дахь автобусны жолооч нар цалингаа нэмүүлэхийг шаардаж пүрэв гарагт /2024.03.28/ ажил хаяж, нийтийн тээвэрт томоохон доголдол үүсгэсэн юм.
Тэгвэл Сөүлийн автобусны жолооч нарын үйлдвэрчний эвлэл ажил хаяж эхэлсэн өдөртөө хотын захиргаатайгаа хэлэлцээ хийж цалингаа нэмүүлсэн байна. Жолооч нар хэлэлцээний дараа цагт авдаг цалингаа 4.48 хувиар нэмэгдүүлэхээр тохиролцжээ.
Эхэндээ жолооч нарын эвлэл цалингаа 13 хувь хүртэл нэмэгдүүлэхийг шаардаад байсан юм. "Economic Research Insitute"-ийн сайтаас харвал БНСУ-д автобусны жолооч дунджаар цагт 17,291 вон (43,573 төгрөг), жилд 35,965,414 воны (90,632,843 төгрөг) цалин авдаг байна.
Сөүлийн жолооч нар хүссэн зүйлээ ер нь авчихдаг гэж хэлэхэд болно. Тэд өмнө нь 2012 онд цалингаа нэмэгдүүлэхийг шаардаж ажил хаяж эхлэхэд хотын захиргаа 20 минутын дотор тохиролцоонд хүрсэн байдаг.
