СУРРОН УНАХЫН ТУЛД ЖОЛООДОХ ЭРХИЙН А ҮНЭМЛЭХТЭЙ БАЙХ ДҮРЭМ ҮЙЛЧИЛЖ ЭХЭЛЛЭЭ
2024 онд улсын хэмжээнд суррон, скүүтертэй холбоотой зам тээврийн 223 осол цагдаагийн байгууллагад бүртгэгдсэн байна.
Энэ талаар ТЦА-наас тодруулахад "2024 онд суррон дугуйтай холбоотой зам тээврийн осол 159, скүүтертэй холбоотой осол 64 бүртгэгдсэн байна. Харин он гарснаас хойш буюу 2025 оны эхний гурван сарын хугацаанд тухайн төрлийн осол цагдаагийн байгууллагад бүртгэгдээгүй.
Уг ослын нөхцөл байдлын тухайд дийлэнхдээ замын хөдөлгөөний дүрмээс ангид үйлдэгдсэн байдаг. Тодруулбал, хамгаалах малгай хэрэглээгүй, насанд хүрээгүй хүүхэд унаж хөдөлгөөнд оролцсон зэрэг нөхцөл байдал тогтоогддог. Иймд хуульд заагдсан хэм хэмжээгээ мөрдөж хөдөлгөөнд оролцох шаардлага үүсэж байна" хэмээсэн юм.
Дээрх байдлаас үүдэж “Замын хөдөлгөөний аюулгүй байдлын тухай хууль”-д нэмэлт, өөрчлөлт оруулах тухай хуулийн төсөлд иргэд, олон нийтээс санал авч эхэлжээ.
УИХ-ын даргын 76-р захирамжаар байгуулагдсан замын хөдөлгөөний аюулгүй байдлыг хангах зорилгоор цахилгаан дугуй (суррон), цахилгаан скүүтерийн хэрэглээг зохицуулах талаар хуулийн төсөл боловсруулах үүрэг бүхий Ажлын хэсэг мөн хуралдсан байна.
Дүрэм мэдэхгүй жолоочид, жолоодох эрхийн үнэмлэхгүй бага насныхан замын хөдөлгөөнд оролцож байгаагаас эгнээ байраа буруу эзлэх, машинтай болон явган зорчигчийг мөргөж бусдын эд хөрөнгө, эрүүл мэндэд хохирол учруулах нь их. Өсвөр насны хүүхдүүд суррон ихээр унаж байгаа нь нийслэлийн авто замын хөдөлгөөнд гарах ослын тоонд багагүй нөлөө үзүүлж байгаа.
2025 оны дөрөвдүгээр сарын 01-нээс ТЦА зохицуулалт хийж энэ жилээс албан ёсоор хяналт тавьж, зохицуулалт хийхээр болсон.
Тухайлбал, скүүтерийг мопедын ангилалд оруулсан стандарт батлагдсан байна. Мөн иргэдийн шүүмжлэлтэй ханддаг цахилгаан хөдөлгүүрт сурроныг албан ёсоор мотоциклын ангилалд оруулж, хариуцлага, дүрэм журмыг мөрдүүлж ажиллахаар болжээ.
Жолоодох эрхийн А үнэмлэхтэй байхаас гадна сурронтой замын хөдөлгөөнд оролцох иргэн заавал хамгаалах хэрэгсэлтэй байх шаардлагатай аж.
