ИДЭР ГОЛЫН ХИЙМЭЛ НУУРТ ЗЭВЭГ, ХАДРАН ЗАГАСНЫ 12,000 ЖАРАМГАЙГ ТАВЬЖЭЭ
Завхан аймгийн Тосонцэнгэл УЦС-ын санхүүжилтээр Идэр голын сав газрын захиргаа, “Чулуут тул” НҮТББ-тай хамтран цэнгэг усны индикатор зэвэг, хадран загасны 50,000 ширхэг жарамгайг станцын хиймэл нуурт үржүүлэх ажлыг эхлүүлж, эхний ээлжийн 12,000 жарамгайг Идэр гол нуурт нийлэх цутгал хэсэгт тавьжээ.
Уг арга хэмжээг хэрэгжүүлснээр гол усны цэвэр ариун байдлыг хадгалах, цаашид агнуурын нөөц буй болгох ач холбогдолтой байна.
Идэр гол нь Завхан аймгийн Идэр сумын нутаг Отгонтэнгэр уулын ар Өлзийт хайрхан уулаас эх авч Завхан, Хөвсгөл аймгийн нутгаар дамжин Идэр голын хамгийн том цутгал Чулуут голтой нийлэн 452 км газрыг туулан Дэлгэр мөрөнд цутгадаг маш цэвэр ангилалд хамрагддаг долдугаар эрэмбийн томоохон гол.
Голын Тосонцэнгэл сумын нутгаар дайран өнгөрөх Дархан уул Савын толгойн хавцлыг хааж 8,012 м.кв талбай бүхий хиймэл нуур үүсгэн 375 кВт-ын хүчин чадалтай усан цахилгаан станцыг Герман улсын санхүүжилтээр 2005 онд байгуулж, одоог хүртэл эрчим хүч түгээн ажиллаж байгаа юм.
Уг станц байгуулагдсанаас хойш загасны нүүдэл шилжилт хөдөлгөөн хязгаарлагдаж, тоо толгой цөөрч байна гэх иргэдийн санал ирэх болжээ.
Түүнчлэн станцын загас дамжуулах хоолой нь загас чөлөөтэй саадгүй дамжин өнгөрөх нөхцөл бүрэн хангагдаагүй зэргийг харгалзан зохих арга хэмжээг авч, хамтран ажиллаж байгааг Идэр Голын Сав Газраас мэдээллээ.
