ШИГШЭЭ БАГИЙН БҮРЭЛДЭХҮҮНД ХООЛ ЗҮЙЧ, СЭТГЭЛ ЗҮЙЧ БАГТСАН ЭСЭХ ТАЛААР МҮОХ-ООС ТАЙЛБАР ӨГЛӨӨ
Шигшээ багийн бүрэлдэхүүнд хоол зүйч, сэтгэл зүйч багтсан эсэх талаар Монголын үндэсний олимпын хорооноос дараах тайлбарыг өглөө.
ХООЛ ЗҮЙЧ, СЭТГЭЛ ЗҮЙЧ ШИГШЭЭ БАГИЙН БҮРЭЛДЭХҮҮНД БАГТСАН ЭСЭХ ТАЛААР
Олимпын наадамд оролцох багийн бүрэлдэхүүнийг зөвхөн тухайн спорт холбоод оногдсон квотын хүрээнд бие даан шийдвэрлэдэг бөгөөд МҮОХ нь тухайн спорт холбоодоос ирүүлсэн мэдүүлгийн дагуу мандат захиалдаг болно. “Парис 2024” наадмын хүрээнд 2023 оны есдүгээр сард Спортын анагаах ухаан, эрдэм шинжилгээний төвийн харьяанд “Үндэсний шигшээ багийг дэмжих баг”-ийг спортын эмч, спортын сэтгэлзүйч зэрэг мэргэжилтнүүдийг оролцуулан байгуулсан.
Энэхүү дэмжих баг нь БТСУХ, Үндэсний шигшээ баг, САУЭШТ-ийн шийдвэрээр гэрээний дагуу 17 хүний бүрэлдэхүүнтэйгээр спортын сургалт, дасгалжуулалт, спортын сэтгэл зүй, спортын хоол зүй гэсэн үндсэн нэгжид хуваагдан ажиллажээ.
Спортын сургалт, дасгалжуулалтыг дэмжих багийг Ардын багш, хөдөлмөрийн баатар Ч.Насантогтох, спортын сэтгэл зүйн багийг Б.Золзаяа, спортын хоол зүйн багийг С.Мөнхтуул нар ахлан ажиллаж, шигшээ багийн бэлтгэл сургуулилалт болон тэмцээн уралдааны үеэр үүрэгт ажлаа гүйцэтгэсэн.
ПАРИС 2024 НААДАМД ШИГШЭЭ БАГИЙГ ДЭМЖИХ БАГИЙН БҮРЭЛДЭХҮҮНИЙ ТАЛААР
Мөн Парис 2024 наадамд шигшээ багийг дэмжих багийн бүрэлдэхүүний хувьд Парис хотноо “Үндэсний шигшээ багийг дэмжих баг”-ийг төлөөлөн Ч.Насантогтох, Б.Бат-Отгон, Ж.Отгонцагаан нар чиг үүргийн дагуу ажиллаж байна. МҮОХ нь уг багийн гишүүдийг олимпын наадамд оролцоход санхүүгийн дэмжлэг үзүүлэх, виз мэдүүлэхэд шаардлагатай албан бичгээр хангах зэргээр дэмжин ажилласан.
Энэ удаагийн Олимпын наадамд оролцож буй Монголын шигшээ багт Спортын анагаах ухаан, эрдэм шинжилгээний төвөөс эмч М.Булган, физиотерапист буюу хөдөлгөөн засалч Ч.Туул нар багтан ажиллаж байна. Мөн боксын шигшээ багийн бүрэлдэхүүнд Монгол улсын гавьяат эмч Ч.Насанбат, жүдогийн шигшээ багийн бүрэлдэхүүнд М.Нишикидо багтсан гэв.
