ШУВУУ АЖИЛЛАГАА: МАНСУУРУУЛАХ ЭМ, БОДИСЫГ ХУУЛЬ БУСААР ХАДГАЛСАН ХЭРЭГТ ШАЛГАГДАЖ БАЙХ ҮЕДЭЭ ОРГОН ЗАЙЛСАН ЭТГЭЭДИЙГ ТУРК УЛСААС АЛБАДАН АВЧИРЛАА

Засгийн газраас зарласан 5Ш ажиллагааны нэг болон "Шувуу" ажиллагааны хүрээнд гэмт хэрэгт шалгагдаж байх үедээ Монгол Улсын хилээр оргон зайлсан этгээдүүдийг эх оронд нь авч ирж шалгаж буй. Тэгвэл Интерполын “Хөх булант” зар мэдээгээр эрэн сурвалжлагдаж байсан Монгол Улсын иргэн “М”-г холбогдох хууль тогтоомжийн хүрээнд энэ оны 04 дүгээр сарын 19-ний өдөр Бүгд Найрамдах Турк Улсаас Монгол Улсад албадан авчирч, мөрдөн шалгах ажиллагааг үргэлжлүүлэн явуулж байна.

Дээрх этгээд нь “Шувуу” ажиллагааны хүрээнд эрэн сурвалжлагдаж байгаа оргодол этгээдүүдийн жагсаалтад багтсан ба мансууруулах эм, сэтгэцэд нөлөөт бодисыг худалдаалах зорилгогүйгээр хууль бусаар хадгалсан гэх хэрэгт холбогдон шалгагдаж байхдаа гадаад улсад оргон зайлсан байжээ. Иргэн “М”-г Монгол Улсад авчрах ажиллагааг Хууль зүй, дотоод хэргийн яам, Гадаад харилцааны яам, Цагдаагийн ерөнхий газар хамтран зохион байгуулсан байна.