ШҮҮХ: Т.ДАВААДАЛАЙГ БАРИВЧИЛСАН ШИЙДВЭРИЙГ “ҮНДЭСЛЭЛ ХАНГАЛТГҮЙ“ ГЭХ ШАЛТГААНААР ХҮЛЭЭН АВАХААС ТАТГАЛЗСАН

Нийслэлийн Засаг даргын Эдийн засаг, дэд бүтцийн асуудал хариуцсан нэгдүгээр орлогч Т.Даваадалайг 48 цагийн хугацаатай саатуулаад байсан бөгөөд түүнийг баривчилсан шийдвэрийг хүчинтэйд тооцох хүсэлтийг шүүх хүлээн авахаас татгалзсан тухай бид өмнөх мэдээллээрээ хүргэсэн.

Тодруулбал, Нийслэлийн Прокурорын газрын хяналтын прокуророос түүнийг хойшлуулшгүйгээр баривчилсан мөрдөгчийн шийдвэрийг хүчинтэйд тооцуулах тухай санал ирүүлснийг шүүх өчигдөр /04.27/ хянан хэлэлцсэн.

Нийслэлийн Прокурорын газрын хяналтын прокуророос Эрүүгийн хэрэг хянан шийдвэрлэх тухай хуулийн 31.4 дүгээр зүйлийн 1 дэх хэсгийн 1.5, 31.5 дугаар зүйлийн 1 дахь хэсгийн 1.3, 31.5 дугаар зүйлийн 3 дахь хэсэгт тус тус заасан үндэслэлээр сэжигтнийг хойшлуулшгүйгээр баривчилсан мөрдөгчийн шийдвэрийг хүчинтэйд тооцуулах тухай санал ирүүлсэн ба шүүх хэрэгт авагдсан баримтуудтай танилцахад прокурорын саналд сэжигтнийг хойшлуулшгүйгээр баривчилсан шийдвэрийг хүчинтэйд тооцох, эсхүл шүүхийн зөвшөөрлөөр сэжигтнийг баривчлах шийдвэр гаргуулах тухай хоёр өөр агуулга бүхий үндэслэлүүдийг дурьдсан, сэжигтнийг баривчилсан хугацааг зөрүүтэй байдлаар тэмдэглэсэн, Эрүүгийн хэрэг хянан шийдвэрлэх тухай хуулийн 31.5 дугаар зүйлийн 2 дахь хэсэгт заасан аль үндэслэлээр хойшлуулшгүйгээр баривчилсан шийдвэрийг хүчинтэйд тооцуулах эсэх нь тодорхойгүй зэргээр прокурорын саналыг хүлээн авах үндэслэлгүй гэж үзжээ.