Н.АЛТАНХУЯГ: НАМАЙГ ХААНА ОЧ ГЭНЭ, ТЭНД БИ ДЭВШИНЭ
Ардчилсан намын Улс төрийн зөвлөл хуралдаж, УИХ-ын сонгуульд сойх нэр дэвшигчдээ тодруулж байна. Улс төрийн зөвлөлийн дараа Үндэсний бодлогын хороо хуралдаж, нэрсийг эцэслэнэ.
Одоо Үндэсний бодлогын хорооны хуралдааныг хүлээж, АН-аас горилогочид Corporate Hotel and Convention Center-ийн үүдэнд зогсож буй.
Энэ үеэр Ерөнхий сайд асан, УИХ-ын гишүүн Н.Алтанхуяг байр сууриа илэрхийллээ.
Тэрбээр "Н.Алтанхуяг нэг удаа УИХ-ын гишүүн болох бол миний зорилго биш. Улс орон хэцүү, баялгийг цөөн хүн эзэмшиж, авлигаар дэлхийд толгой цохих гэж байгаа нөхцөлд амин хувиа бодохгүй. Нам тэнд очоод, ингээд үз л гэвэл хаана ч би бэлэн. Би тэгэх үүрэгтэй. АН-ын даргаар зургаан жил ажилласан. Манай нам олон жил ялагдлаа, ингэхээр ард түмэн хохирч байна. АН бүр их хохирдог. Нийгмийн том ялгарал үүсдэг.
Иймд би нэр дэвших агуулгаар биш Монголын ардчиллыг хамгаалж, хүчирхэгжүүлэхэд анхаарна. Н.Алтанхуягийг хаана оч гэнэ, тэнд очно. Сөрөг хүчингүй найман жил болчихлоо. Залуусыг их оруулах нь зөв зүйтэй. Хулгайч хууччуулаас салах нь зөв. Эх оронч залуусаа дэмжих хэрэгтэй. Би Монголын ард түмнийг эрх биш харьцуулж, харж байгаа гэж бодож байна. Би Ерөнхий сайд байхдаа яаж ажилладаг вэ гэдгээ олон талаас харуулсан. Түүнээс хойших найман жилд ухардаг араандаа хийгээд давхилаа. Би энэ удаад АН ялах ёстой, ялахгүй бол Монгол Улс дахин дөрвөн жилээр ухарна гэж үзэж байгаа. Харин АН өөрөө зоригтой, хүчтэй байх шаардлагатай. Энэ бол хоосон амладаг сонгууль биш. Хийсэн бүтээснээр нь харьцуулчих хэрэгтэй.
Намын болон улс орны зовлонг би мэдэж байна. Шийдвэр гаргахад хэцүү, бүгдийн хүсэл зорилгод нийцүүлэх боломжгүй. Харин найман жил ялагдсан намыг сонгож орж ирж байгаа залууст талархаж байна" гэлээ.
