ХСҮТ: МОНГОЛ УЛС ЭЛЭГНИЙ ХАВДРЫН ӨВЧЛӨЛӨӨРӨӨ ДЭЛХИЙН 180 УЛСААС НЭГДҮГЭЭР БАЙРТ ЖАГСЧ БАЙНА
Хавдар судлалын үндэсний төвөөс өнөөдөр (2024.01.30) хавдрын нөхцөл байдлын талаарх тооцоо судалгааг танилцууллаа.
Тодруулбал, ХСҮТ-ийн амбулаторийн үзлэг 2023 онд 146 хувиар өссөн аж. Өнгөрсөн 2023 онд хавдрын 7244 шинэ тохиолдол бүртгэгдэж, 4556 хүн хавдрын оношоор нас баржээ. Мөн Монгол Улс элэгний хавдрын өвчлөлөөрөө дэлхийн 180 улсаас нэгдүгээр байрт жагсч байна. Монгол Улс нийт хорт хавдрын шалтгаант нас баралтаар дэлхийд нэгдүгээр байранд, элэг болон ходоодны хорт хавдрын шалтгаант нас баралтаар мөн тэргүүлж байгааг эмч нар онцоллоо.
Нийт нас баралтын таван хүн тутмын нэг нь хорт хавдрын шалтгаантай. Нас барж байгаа хүмүүс дотроо нэг жил хүрэхгүй байгаа нь нас баралтын 60 хувийг эзэлж байна. Өөрөөр хэлбэл, энэ үзүүлэлтийг өмнөх онтой харьцуулахад дөрвөн хувиар буурсан. Өнгөрсөн 2022 онд 66 хувь байсан. Харьцангуй хорт хавдар нь төгс эдгэж, хяналтад байгаа хүмүүс 43.3 хувийг эзэлж байна. Нийт оношлогдсон 7244 хүний 65 хувь нь буюу хожуу үе шатандаа оношлогдсон байна. Энэ жилийн үзүүлэлт таван пунктээр буурсан. Мөн 45-аас дээш насны хүмүүс 85 хувийг эзэлж байгаа юм.
Мөн Монгол Улсад 2040 он гэхэд өвчлөл эрэгтэй хүйсэнд 90 хувь, эмэгтэй хүйсэнд 101 хувиар, нас баралт эрэгтэй хүйсэнд 97 хувь, эмэгтэй хүйсэнд 101 хувиар өсөх хандлагатай байна гэдэг судалгааг дэлхийн эрүүл мэндийн байгууллагаас гаргажээ.
