Б.ЖАВХЛАН: ТАНАЛТЫГ ХӨРӨНГӨ ОРУУЛАЛТААС ЭХЭЛЖ, ХАМГИЙН СҮҮЛД УРСГАЛ ЗАРДЛААС ТАНАНА
2025 оны батлагдсан төсөвт Монгол улсын Ерөнхийлөгч У.Хүрэлсүх бүхэлд нь хориг тавьсан. Улмаар Төрийн тэргүүний энэ шийдвэртэй холбогдуулан Сангийн сайд Б.Жавхлан мэдээлэл хийлээ. Тэрбээр: “Алдагдалгүй төсөв байлгахын тулд бид нэлээд үйл ажиллагаагаа танах, хөрөнгө оруулалтаа гацаах, хойшлуулах болж байна. Энэ жилийн нэмэгдсэн төсвийн 60-70 хувь нь хуулийн дагуу нэмэгдэж байгаа урсгал зардлууд байна. Жишээ нь, цалин, тэтгэврийн нэмэгдэл, хууль хүчний байгууллагын зардлын өсөлт, боловсролын салбар дахь хуулийн реформ гэх мэт. Харин төсвийн хэлэлцүүлгийн үед яригдаж байсан томилолтын зардал, Соёлын яамны ваучер зэрэг бол алдагдалгүй төсөв батлахад маш бага хувь эзэлж байгаа.
Таналтыг хөрөнгө оруулалтаас эхэлнэ. Ирэх онд шинээр хийгдэх 1.7 их наядын хөрөнгө оруулалт байгаа. Хамгийн сүүлд нь урсгал зардлаа танана. 2.2 их наяд орчим төгрөгийн зардлын таналт хийж байж алдагдалгүй төсөв батлах боломж бүрдэнэ" гэв.
