УЛСЫН ТӨСВИЙН ОРЛОГО 36.7 ХУВИАР БУУРЧЭЭ
Улсын нэгдсэн төсвийн орлого, тусламжийн хэмжээ энэ оны эхний сарын урьдчилсан гүйцэтгэлээр 1.7 их наяд төгрөгт хүрч, өмнөх оны мөн үеийнхээс нэг их наяд төгрөг буюу 36.7 хувиар буурсныг Үндэсний статистикийн хорооноос танилцуулав. Харин улсын төсвийн зарлага, эргэн төлөгдөх цэвэр зээлийн хэмжээ энэ хугацаанд 2.2 их наяд төгрөг болж, өнгөрсөн жилийнхээс 106.4 тэрбумаар буюу 5.2 хувиар өсжээ. Төсвийн орлого ийн хумигдахад татварын болон ашигт малтмалын нөөц ашигласны төлбөрийн орлого буурсан нь голлон нөлөөлсөн байна. 2025 оны нэгдүгээр сард төвлөрүүлсэн орлогын албан татварын хэмжээ өмнөх жилийнхээс 46.6, нэмэгдсэн өртгийн албан татварынх 33.9, ашигт малтмалын нөөц ашигласных 86.1 хувиар буурснаар нийт татварын орлого 44.1 хувиар багасаж, 1.5 их наяд төгрөгт хүрсэн гэнэ. Харин төсвийн зарлага 5.2 хувиар өсөж, тэнцэл нь 492 тэрбум төгрөгийн алдагдалтай гарахад бараа, үйлчилгээний зардал өмнөх оны мөн үеийнхээс 23.8, урсгал шилжүүлгийнх 16.4 хувиар нэмэгдсэн нь голлон нөлөөлжээ.
