ШҮҮХ: ЖОЛООЧ ДҮРЭМ ЗӨРЧСӨНӨӨС БУСДЫН ТЭЭВРИЙН ХЭРЭГСЭЛД МӨРГҮҮЛСЭН БОЛ ХОХИРЛЫГ ӨӨРӨӨ ХАРИУЦНА

Иргэн Л.Л 2023 оны 3-р сарын 18-ны өдөр Тэрэлжийн замд машин жолоодож яваад эгнээ солихдоо Т.Т-ийн жолоодож явсан машины урдуур орж мөргүүлсний улмаас түүний автомашин болон эрүүл мэндэд нь 5,045,070 төгрөгийн хохирол учирсныг Т.Т-ээс гаргуулахаар шүүхэд нэхэмжлэл гаргажээ. 

Т.Т “...осол Л.Л-ын буруугаас болж гарсан нь шинжээчийн дүгнэлтээр тогтоогдсон, уг дүгнэлтээр миний зөв гэж гарсан” гэж маргасан байна. Анхан шатны шүүх нэхэмжлэлийн зарим хэсгийг хангасныг давж заалдах шатны шүүх бүхэлд нь хэрэгсэхгүй болгож шийдвэрлэхдээ дараах дүгнэлтийг хийсэн байна. 

Л.Л нь замын хөдөлгөөнд оролцож 1-р эгнээнээс 2-р эгнээнд шилжихдээ 2-р эгнээнд чигээрээ явсан Т.Т-ийн машины урдуур орсон үйлдэл нь Монгол Улсын Замын хөдөлгөөний дүрмийн 10.4-т “жолооч байр эзлэхийн өмнө зэрэгцээ эгнээнд чигээрээ яваа тээврийн хэрэгсэлд зам тавьж өгнө” гэсэн заалтыг зөрчсөн нь Тээврийн цагдаагийн албаны мөрдөгчийн магадлагаа, хэргийн газрын үзлэг, Техникийн шинжээчийн дүгнэлт, Тээврийн Прокурорын газрын прокурорын тогтоолоор тус тус тогтоогдсон.

Харин замын хөдөлгөөний дүрэм зөрчсөн Л.Л-ын буруутай үйлдлээс болж түүний машиныг Т.Т мөргөсөн нь замын хөдөлгөөний дүрэм зөрчөөгүй гэж шинжээч дүгнэжээ.

Зам тээврийн ослын улмаас Л.Л-ын машин болон хамт зорчиж явсан хүмүүс гэмтэж, улмаар 5,045,070 төгрөгийн хохирол учирсан ч зам тээврийн осолд Л.Л өөрөө буруутай, харин Т.Т-ийн хувьд хууль, дүрэм зөрчсөн буруугүй тул тухайн хохирлыг хариуцах хууль зүйн үндэслэлгүй гэж дүгнэв. 

Иймээс зам тээврийн осолд нэхэмжлэгч Л.Л өөрөө буруутай тул тэрээр өөрийн автомашинд болон хамт зорчиж явсан хүмүүсийн эрүүл мэндэд учирсан хохирлыг зам тээврийн осолд буруугүй Т.Т-ээс нэхэмжилснийг анхан шатны шүүх хангаж шийдвэрлэсэн нь хуульд нийцэхгүй, Т.Т уг хохирлыг хариуцах үүрэггүй гэж үзсэн хэмээн Нийслэлийн Иргэний хэргийн давж заалдах шатны шүүхийн шүүгч Э.Энэбиш бичсэн байна.