СЭРЭМЖЛҮҮЛЭГ: УЛААНБААТАР-МАНДАЛГОВЬ ЧИГЛЭЛИЙН ЗАМ ЦАСАН ШУУРГАТАЙ БАЙНА
Улаанбаатар-Мандалговь чиглэлийн А0201 дугаартай авто зам дагуу өнөөдрийн 09.20 цагийн байдлаар цасан шуургатай, үзэгдэх орчин хязгаарлагдмал байна.
Тус авто зам хариуцагч “Төв АЗЗА” ТӨХК-иас замын үзлэг хийжээ. Зам даваа саадгүй байна. Цасан шуургатай, үзэгдэх орчин хязгаарлагдмал байгаа энэ үед жолооч болгоомжтой хурдаа тохируулан зорчихыг анхаарууллаа.
2024 оны 11-р сарын 28-наас 2024 оны 12-р сарын 02-ныг хүртэлх цаг агаарын урьдчилсан төлөв:
28, 29-нд Хэнтийн уулархаг нутаг, Онон, Улз, Халх голын хөндийгөөр, 12-р сарын 01-нд төв болон зүүн аймгуудын нутгийн зарим газраар цас орж, цасан шуурга шуурна. Салхи ихэнх нутгаар секундэд 6-11 метр, говь, талын нутгаар секундэд 14-16 метр хүрч ширүүснэ. 29, 30-нд ихэнх нутгаар өдөртөө хүйтний эрч суларч Завхан голын эх, Хүрэнбэлчир орчмоор шөнөдөө -27...-32 градус, өдөртөө -13...-18 градус, Дархадын хотгор, Хөвсгөл, Хэнтийн уулархаг нутаг, Идэр, Ерөө, Туул, Тэрэлж, Хэрлэн, Онон, Улз, Халх голын хөндий, Дорнод-Дарьгангын тал нутгаар шөнөдөө -18...-23 градус, өдөртөө -8...-13 градус, Их нууруудын хотгор, говийн бүс нутгийн баруун өмнөд хэсгээр шөнөдөө -4...-9 градус хүйтэн, өдөртөө +1…+6 градус дулаан, бусад нутгаар шөнөдөө -10…-15 градус, өдөртөө -2...-7 градус хүйтэн байна.
